Будинок Скупштини Городу Нового Саду проєктовали архитекти Сибин Дьордєвич (добитнїк награди „Дьордя Табаковича“) и його супруга Милена.
Будовани є од 1958. по 1960. рок кед є и уселєни. Ма 5.334 квадратни метери хасновитей поверхносци на штирох поверхох, з тим же єдна його часц ма поверх менєй. Тот обєкт од вше бул шедзиско городского парламенту и фиґурує як єден з двох главних будинкох городскей власци, а першобутно бул центер срезу, та аж познєйше достал назву скупштина. Предсидатель городского парламенту вше шедзел у тим будинку, цо и нєшка случай. Под час функционованя срезу, на штвартим поверху, було воєне оддзелєнє. Будинок ма три уходи, вецей як сто канцелариї, пейц сали за схадзки, библиотеку, друкарню и ресторан. Друкарня за потреби Скупштини направена додатно, кед будинок приключени на централне зогриванє. По теди ше тот простор хасновало як ґаражу за роботнїкох городскей управи и локалних функционерох.
На першим ше поверху находза кабинети предсидателя Скупштини, його заменїка, секретара и його заменїка, а ту и три сали за схадзки. Городски управи за транспорт, спорт, здравство и социялну защиту, Скупштинска служба, Сектор за информованє и Протокол, як и Мала сала и дактилобиро, находза ше на другим поверху. На трецим ше поверху находза городски управи за общу управу, финансиї, предписаня и образованє. На штвартим поверху Заєднїцка служба, Городска управа за комунални роботи и ресторан.
Пред дзешец роками утвердзене же ше ушедує патос у прижемю на другим и трецим уходзе, та зробена комплетна санация з армированьом бетонскей плочи и зоз заменьованьом дослужених и витрошених мраморових плочох. Теди ше почало и реновирац цали будинок. З тей нагоди заменєни вецей як 400 древени облаки, обилєни цали будинок, реновирани шицки 19 мокри ґузли, направена нова подстанїца за централне зогриванє, обновена гидроизолация закрица и заменєна громобранска инсталация. Заменєни дослужени канализацийни и водоводни инсталациї, обновени главни напружни електрични вод у обєкту, заменєни комплетни облаки и дзвери, клянки, реновирана скупштинска сала, инсталовани нови розглас у Велькей, Белавей и Сали 18, положени рухоми уходни дзвери, направена приступна рампа ґу будинку за гендикеповани особи и положене скло на углє Булевара Михайла Пупина и Улїци Жарка Зренянина. Заменєни и дослужени лифти стари 45 роки, хтори доходзели лєм по треци поверх. До будинку дньово войдзе коло тисяч людзох.
Пред даскелїма роками инсталоване електронске гласанє у скупштинскей сали, у хторей шедза 78 одборнїки и одборнїци.
Векшина канцеларийох ма убудовани клима-пошореня. Цали будинок закрити з микро-камерами, так же чуваре на уходзе до Скупштини маю цали препатрунок. Паркинґ, хтори ше находзи поза будинку Скупштини, явни.
Городска управа ма 67 обєкти, з чого 47 месни заєднїци, а окрем Городскей хижи и Скупштини Городу, исную и обєкти городскей управи у Роботнїцкей, Руменацкей, Улїци Народного фронту и Улїци Стевана Брановачкого, а под єй инґеренцию и Матичне зданиє, архива, клуб одборнїкох, Синаґоґа, ґаража на СПЕНС и “Чески маґацин”.
Скупштинска библиотека отворена за шицких гражданох. Попри 1500 фахових виданьох у вязи зоз предписанямии законами, ту ше находза и Службени новини СФРЮ, Сербиї, Войводини и Нового Саду. Каждодньово ше прави препатрунок преси, та ту и документация шицких дньових новинох. У библиотеки ше чува и ґенерални урбанистични плани за цали город, а ту архивовани и записнїки зоз схадзкох городского парламенту зоз 1968. року.